KAHINUMDOMAN

(March 15, 2010)

Niadto sa among panahon walay elektrisidad. Lampara de gas lang ang among suga. Pila ka tuig petromax na. Haskang hayaga. Kung magtuon mi, mata sayong kaadlawon. Dayon magsindi ug kandila sigun sa tambag sa among maestra kay bugnaw ang iyang kahayag ug hayahay sa mata. Makapa-bright kuno. Siguro tinuod kay sige man ko ka-highest sa test kuno. Bright tingali ko.

Ngano mang dili? Sige man mi kaon isdang bulinaw. Plus daghang utanon kay kugihan man tong among Mama magtanom. Gitawag ug "green finger or green thumb" kay bisan unsa na lang iyang itanom mabuhi man. Mga kasilinganan gud kugihan pod moani kay tiaw mo ba wa na silay hago. Manghangdos na lang. Buot ko ipasabot, mangayo ba kay naa man. Among tugkaran dili ra layo sa mga kasilinganan.

Among sports kay takyan, patintiro, patid lata, skipping rope (ambot unsay binisaya ani), tago-tago, ginukganay ...tunay gyud nga physical fitness. Walay gym, walay work out, walay Biggest Loser. Kahinumdoman, wa gyod isa sa among lungsod nga over the limit ang lawas (obese ba) gawas ni Manang Celia (tabi Manang). Tag-iya gud siya ug karinderya, so dayag na lang nga iyang kuskos, iyang sayaw di ba?

Kung mag-eskwela mi dili mi pabulonon sa among Mama. Dagan lang mi sa balay inig ka-recess. Timo-timo lang mi bahaw nga sud-anan ug ginamos nga bulinaw kung wa man gani linung-ag nga saging, kamote ba kaha o ubi. Himsog sab baya mi.

Among sapot plantsado. Inarmerolan pa. Mora gud ug karton kagahi. Tuskig lagi mi molakaw. Karon mga wash and wear na ang moda. Labi na diri sa Australia, walay tagad ang mga tawo diri. Bisan executive moadto sa opisina nga kunot ang sapot. Asa ka.

Ka-simple sa kinabuhi niadtong gamay pa ako.