NALINGA LANG

March 18, 2010

Wa nako humana ang ikaduhang semestre sa Mindanao State University diin ako mikuha ug Community Development and Business Administration. Gisamokan ko sa way puas nga pagwelga sa mga kanahang mga estudyante nga ga-awat-awat sa mga kalihokan sa Manila. Kini laging kinaiya nato nga awatiro. Unsay tuwad ni Juan, tuwad sab ni Pedro.

Duna silay (demonstrador) katarongan sa mao nilang activism. Duna sab koy kaugalingong rason nganong wa ko modapig ni mag-apil-apil nila. Likay lang ko kay masamok na. Tuod man, nauli sa kagubot inay sa kalinaw ang mao nilang demonstrasyon.

Luyo sa pagsupak sa akong inahan, misulod ko ug trabaho sa botika sa lungsod. Mora man ug dili angayan tawgon ang Marawi ug City niadtong panahona. Dili ko na ipadayag ang hinungdan sa akong opinyon. Ah basta.

Lingaw kaayo ko sa trabaho bisan gitawag ug 'slave work'. Espoko moy 15 ka oras ang trabaho lakip na sa balay (live-in employment) inig-uli. Bata ang lawas pero bun-og sa sobrang trabaho. Among pahulay kana rang magsimba dayon deretso sa trabaho pag-uli. Kung wa mi pakaona ug maayo malagmit gyud sa telebisyon (TB) pauli ang among lawas. Gikaloy-an sab pod baya mi sa kahitas-an. Wa man mi reklamo bisan diotay. Basta kugi lang.

Tanan nakong mga kauban sa trabaho dunay mga trato gawas nako. Ila kung gipa-ila-ila sa usa nila ka higala nga gatrabaho sa konstruksiyon. Buotan man sa akong paniid. Sa dihang nangulitawo wa sab nako dugaya ang pagsugot kay total
respetado man ug miangay ko sa iyang gawi. Wa lang nuon mi nakahigayon pag-date.

Usa lang tingali to ka bulan sukad mi nagkatrato, iyang gipalandong nga walay kaugmaon kung magpadayon siya isip construction worker. Maong midesider siya pag-uli sa ilang probinsiya sa Siquijor. Wa man ko niya kalimti kay misulat man siya nako. Nagsinulatay ming duha. Mora na nuon mig magpenpal.

Takulahaw na lang akong nahibaw-an nga misulod siya sa military training. Ayay pagkamingaw.

Usa ka adlaw niana, nakadawat ko ug duha ka sulat. Isa gikan sa akong iyaan sa Cebu (RIP) ug ang ikaduha gikan sa akong my love. Gitubag nako ilang duha ka sulat. Duha ka sobre akong giandam. Usa asol. Usa puti. Ang asul akong gitagana para sa akong darling.

Siyalan ba nga ang sulat para sa akong uyab kay tua man diay nako nasulod sa sobre para sa akong iyaan. Dayon ang para sa akong iyaan tua nasulod sa sobre para sa akong sweetheart. Kung ngano nga kompyansa kaayo ko ug wa nako susiha una nako selyohi ang mga sobre. Na mao ron.

Liboga kaha sa duha ka mga inosenteng kalag nga buhi. Ang akong mga kaigagawan pwerte gyud nilang sungog nako. Akong dear way "SAY" (no comment ba). Pero akong gi-imadyin unsa ang iyang katingala ug unsay nahitabo sa sweetheart nga iyang gibiyaan.

Hmmm sa akong hunahuna pa ... wa man sab koy gisulti nga "censored" ngadto sa akong uyab.

Hay ... kabuang baya nako. Bata pa unta naunsa man nga limtanon man.

Asa ka kay hangtod ron ... maulaw pa baya kung mohinumdom ato. (Papula lang ni sa dagway).